Menü
Hannoversche Allgemeine | Ihre Zeitung aus Hannover
Anmelden
Ina Müller: "Dree in Een"
Nachrichten Kultur Themen Op Platt Ina Müller: "Dree in Een"
Partner im Redaktionsnetzwerk Deutschland
15:36 03.01.2011
Ina Müller, „Dree in Een“, 272 Seiten, 12,80 Euro, erschienen im Quickborn-Verlag Hamburg. Erhältlich in allen Buchhandlungen. Quelle: HAZ-Bild

Uns hett ’n – ik glööv al in’n Kinnergorden – bibröcht, dat een vun de schlimmsten minschlichen Eegenschaften woll de Giez is. Kinner, de nix afgeven dään, de worrn in’n Kinnergorden al dormit optrocken, in de School later knallhart dör „Nichtachtung“ strooft un in ’ne Pubertät worr Giez sowat vun unsexy. Wenn ’n Typ rinkeem un he nich sofort sien Zigarettenschachtel op’n Disch schmieten dä, dennso harr he al verlorn. Nüms vun uns Deern wull mit ’n Jung knutschen, de sien Zigarettenschachtel boven in sien Jeansjackentasch stecken harr und sik jümmer blots een enkelte Zigarett, blot för sik, mit ’n geschickte, nich to opfällige Handbewegung, ut de Tasch pulen dä, dat blots nüms seggt: „Oh, gib mir auch mal eine!“

Jichtenswo güng denn over woll ’n Ruck dör düsse slechteste vun de slechten Eegenschaften, un de Giezigen weern nu nich mehr de Giezigen, sünnern de „Schnäppchenjäger“, wat sik je eerstmol wat „sportlicher“ anhöört, as „Giezkragen“, ode sowat.

Se föhrt kilometerwiet to’n Tanken över de Grenz, wiel dat Benzin dor ’n poor Cent billiger is. Se fleegt no de Türkei, wiel de Ogen-OP dor 400 Euro billiger is, ok, wenn jem dat alleen 400 Euro köst, dor överhaupt hen to komen. Se kööpt sik de gesammelte, klassische CD-Edition vun Rachmaninow, nich wiel se Rachmaninow kennt ode geern höört, sünnern wiel ’n sooo veele CDs för sooo weenich Geld kriggt.

Noch schlimmer, de „Billigflüge“ vun Köln no Madrid för 19 Euro!

Wenn ik mi vörstell, ik sitt dor in so’n Fleger binnen un de störrt af, un dennso steiht noher op mien Graffsteen: „Starb beim Absturz eines Billigfliegers (19 Euro), irgendwo zwischen Köln und Madrid“. Düsse Schmach! Un de Lüüd worrn denn op dat Gräffnis frogen: „Ach, wat will de eegentlich in Madrid?“ – „Nix“, worrn sedenn to höörn kriegen, „over de Flug weer so schöön billig!“

Den echten Giez, ode seggt wi mol, Giez in sien „absolute Vollkommenheit“, den gifft dat nu över’t Internet to buchen.

Ik meen dat „Speed-Dating“. Dat is ’n niege Form vun „Blind-Date“. „Blind-Date“ heet jo, dor droopt sik Mann und Fruu, ohn sik to kennen un eet ’n beten wat, un drinkt ’n beten wat und vertellt sik ’n beten wat un mit ganz veel Glück verliebt se sik sogor ’n beten wat.

Nu kann so’n Ovend over doch al mol wat lang warrn, wenn du di Klock 8 drepen deist, un veertel no 8 haut di dat over al vör langewiel den Kopp in’ne Supp, wiel du weest, dat he mol wedder nich de „Liebe des Lebens“ is, sünnern wenn överhaupt, dennso is he ’n „Kompromiss“, un ’n Kompromiss is nu mol jüst dat Gegendeel vun de „Liebe des Lebens“. Un wiel dat allens to lang duurt un ok to veel Geld un to veel Tiet köst, gifft dat nu „Speed-Dating“. Dat funkschioneert meist so as de Reis no Jerusalem: 7 Fruun, 7 Männer, droopt sik in 1 Lokal. Se sitt sik gegenöver, un hebbt genau 7 Minuten Tiet, sik 1 mol kennen to leern, un wenn de 7 Minuten üm sünd, dennso rutscht he gau een wieder, zack, an’n neegsten Disch …

Schnäppchenjäger ünner sik … ode beter: wenn Giezige geil sünd!

Un dat Schöönste is, de 7 Minuten reekt genau för een Zigarett, wenn he de gau genoog un unopfällig ut sien Jeansjackentasch rutpuult kriggt!

Aus: Ina Müller, „Dree in Een“, 272 Seiten, 12,80 Euro, erschienen im Quickborn-Verlag Hamburg. Erhältlich in allen Buchhandlungen.