Menü
Hannoversche Allgemeine | Ihre Zeitung aus Hannover
Anmelden
Niedersachsen Plattproters bünt echte Keerls
Nachrichten Politik Niedersachsen Plattproters bünt echte Keerls
Partner im Redaktionsnetzwerk Deutschland
22:31 14.09.2011
Justizminister Bernd Busemann seggt: „Dat weer en Barg Arbeit.“ Quelle: dpa
Anzeige
Hannover

As de Präsident an’n Namiddag wedder in den Plenarsaal vun Neddersassen to sitten kummt, hett he en heel besünners Wark to doon. „Nu geiht dat mit Plattdüütsch wieder“, seggt Hermann Dinkla ut Ostfreesland. Denn geiht en Utspraak los, de in de Historie vun dat Huus in Hannover eenmalig is: All mit’nanner debatteert de Afordneten vun de Linken bit to de Christdemokraten munter över de Tokumst vun de plattdüütsche Spraak – up Plattdüütsch.

De CDU- un FDP-Frakschonen hebbt de Anfraag mit 140 Fragen as eerste parlamentaarsche Initiative in plattdüütsche Spraak in den Landdag inbrocht. Justizminister Bernd Busemann seggt: „Dat weer en Barg Arbeit.“

Anzeige

Wo süht dat ut mit Platt in Neddersassen? „Mehr as een Millionen Lüüd in Neddersassen snackt Plattdüütsch in’n Alldag un meist jeder Twete vun de Neddersassen kann Plattdüütsch verstahn“, seggt de CDU-Afordnete Ulf Thiele ut Uplengen. Siet in dat Johr 2007 de Professur för Nedderdüütsch an de Universität Ollenborg inricht worrn is, sünd an düssen Lehrstohl al veer Dissertationen betreut worrn, freit sick Thiele. Butendem nimmt mehr as een vun twee Studeerenden ut de Germanistik de Schangs wahr, Veranstalten to besöken, in de dat üm dat Nedderdüütsche geiht.“

De SPD-Afordneten begrootsnuten de Fragen vun de Regeerungsfraktionen. All tosamen is bi de 140 Fragen nich veel bi rutsuert“, seggt Claus Peter Poppe ut Quakenbrück. „Weet ji, wat ji sünd? Klooksnacker un Wieskoppen!“

För de Grönen is al de Överschrift „Neddersassen snackt Plattdüütsch“ vun de Grote Anfraag vun FDP un CDU frickelig: „Bi uns word platt prot – un neet snackt. Schnackers bünt bi uns Kauelmorsen – man Platproters bünt echte Keerls“, seggt Ralf Briese, de oostfreesche Afordnete vun de Grönen glieks an’n Anfang. Platt is nich Platt. „Wi hebbt en heel Bült verscheden Oorten Platt – un dat is neet einfach, een gemeinsame Platt to kommen.“ Na Menen vun Briese is dat ok gor nich sinnvull. „Dor moken de Lü neet mit. ’n Keerl ut Rheiderland as ik een bün, de will neet proten as en Feentjer.“

De Grönen sünd för Platt-Unnerricht in Vörscholen un in de Grundschool – abers nich gegen den Willen vun de Öllern un Kinner. „Platt unnerstütten, Platt lehren un platt snacken soveel as geiht – aber keen Platt dör Gesetz.“ Ok ut Sicht vun Jan-Christoph Oetjen vun de FDP is de wichtigste Ansatztiet de Grundschool. „Dor warrt de Grundlagen dorför sett, dat de Kinner mal Platt snacken doot. Dat is bi mi ok so ween.“

De Linken-Afordnete Patrick Humke kritiseert de Lannesregerung. „Dat warrt al minner mit dat Plattdüütsche – un vun de Lannesregerung gifft’t ok nich veel Stütt. Anfragen oder Dokumente bi Lannesbehörden sünd up Plattdüütsch gor nich vörsehn. Wenn man dat mit de Förderung vun Plattdüütsch eernst menen deit, mööt wi dat ändern“, seggt he. Mit de Ünnerschrift ünner de Spraken-Charta in Europa in’t Johr 1999 is dat Land de Plicht Verpflichtung ingahn, de plattdüütsche Spraak to schützen un to fördern.

SPD-Politiker Poppe sett sik opletzt för en Mit’nanner vun all tohoop in. „Root un Gröön un Geel un Swatt – wi all snackt Platt“, seggt Poppe. Und de annern proot. Dat geiht ja ok.

Van Dirk Schmaler

Niedersachsen Politiker debattieren auf Platt - "Platdüütsch is wat heel besünners"
14.09.2011
Niedersachsen McAllister schreibt an Röttgen - Abschied von Gorleben?
Stefan Koch 14.09.2011